Qurtuldunmu, igid?

Hicran Qurbanlı  

 
"Hardan gəldin sən igid, yerin nə yerdir?
Qaranlıq gecədə yol azsan, ümidin nəyədir?
Böyük bayraq götürən xanınız kimdir?
Döyüş günü öndə gedən ağsaqqallı atanın adı nədir?
Adın nədir, igid, söylə mənə!?
("Dədə Qorqud” dastanının "Basatın Təpəgözü öldürməsi”
boyundan)
"Qurtuldunmu igid?” - Basatı hər dəfə ölümə yollayan Təpəgözün
sualıdı bu da...
...Yenə bayramdı. Yenə çal-çağırdı. Yenə yarımaq, yarınmaq, yaratmaq
istəyənlərin qəzetlərdə "palaz-palaz” yazıları, efirdə
müzakirələri, mülahizələri, mühazirələri. Şit-şit göstərilər,
əttökən konsertlər, gülüşmələr, didişmələr, irişmələr. Bulvarda
yekun konsert, Rəqsanələr, Ilhamələr səbəbkara şən nəğmələr
qoşacaq, "Üstümüzdən əskik olmasınlar!”- deyə zikr və dualar
edəcək, Bilal "Oğuldur Ilham” "şedevrini” səsləndirəcək. Camaat
da yığılıb çəpik çalacaq, uşaqları oynayacaq, atəşfəşanlığa
tamaşa edib, boz həyatlarını, qara günlərini bircə gün də olsa
təqvimdəkitək qırmızıyla rəngləməyə ümid edəcəklər. Soruşmayın
nə baş verir, nə olub? Bu günü unutmağa hünəriniz nədi?
Tariximin son 17 səhifəsində nələr yazılmadı, nələr pozulmadı. Nə
alçaqlar ucaldıldı, nə ucalar alçaldıldı, nələr söküldü, nələr
tikildi, nələr (kimlər) alınmadı, nələr (kimlər) satılmadı. Amma
nədən qurtulduq, kimdən qurtulduq, bəlli olmadı. Yoxsa oldumu?
Sən ey, əbədi yuxuya gedib, ədəbi röyalar görən,
"Ələmdən-nəşəyə”lər yaradan, yarayan, yaradıcılarım,
qurtulmusunuzmu?
Qara qızılımın və milyonlar səltənətimin qara qəpikdən artıq qiyməti
olmayan qara qulları-qara camaat, qurtulmusunuzmu?
Ölkədən baş götürüb gedən, baş saxlayan, baş girləyən ağıllı
başlarım, soydaşlarım, qurtulmusunuzmu?
Vətəndə qərib olan Vətən qazisi, atəşkəs dövründə əsgər itirən
ana, bacı, qadın, qurtuldunuzmu?
Susanlarım, susdurulanlarım, "Şərəf”lilərim,
"Şöhrət”lilərim, qurtuldunuzmu?
Məmləkətimin intihardan başqa gücü heç nəyə çatmayan üzüqara
kişisi, günüqara qadını, gələcəyi qaranliq gənci, uşağı
qurtuldunuzmu?
Qara çadırlarında oğul evləndirən, qız köçürən, ölənlərini hələ
də "əmanət qəbir”- deyə ayrı, üzü Qarabağa basdıran qaçınlarım,
köçkünlərim, qurtulmusunuzmu?
Seçkidən-seçkiyə yada düşən, seçdiklərinin qapısından qovulan,
üzünü görməyən seçənlərim, qurtulmusunuzmu?..
...O "möhtəşəm qurtuluşumuzun” baş verdiy gündən 17 il keçir. Bir
igidin ömrü. Yəni, 1993-cü ildə doğulan uşaqların indi 17 yaşı var.
Və o günün uşaqları, bu günün igidləri. Səhvlərimizin,
mütiliklərimizin, əzmsizliyimizin ağır nəticələrini yaşamaqdadılar.
Üstəlik bu nəticələri aradan qaldırmaq kimi bir yükü də yumarlayıb
yıxmışıq onların boynuna. Amma qurtulmaq şansımiz var hələ... Uff... Bu
təpəgözlərin qarşısına bir igid çıxmalıdı, ya yox?! Qurtula
bilərsənmi, igid?
hicranqurbanli@yahoo.com