 "ONUN YARISI” ZAY ÇIXDI
ATV xalqı dolamaqla məğuldur; "Yağ kimi” Zaur yeni fırıldaq tapıb; nişanlı gəncləri yeni tanış olmuş kimi tamaşıçılara sırıyırlar
Azərbaycan telekanallarından əhalinin şou-biznes "yuxusuna” verilərək, ictimai-siyasi proseslərdən kənar tutulması barədə dəfələrlə yazmışıq. Demək olar ki, bütün kanallarda gündə bir toy verilişi, sms yarışı başlayır. Bu da birbaşa əhalinin cibinə təsir edir. Efirə çıxan cavan-qoca hər kəs xalqdan sms dilənir.
Belə layihələrin hamısı da xarici kanallardan, xüsusilə Türkiyə televiziyalarından oğurlanmış formatlardır. Əhalini oyalamaq məqsədi daşıyan bu tip proqramlardan biri də ötənlərdə ATV kanalında yayımlanmağa başladı. "Yağ kimi” proqramının aparıcısı Zaur Baxşəliyevin təqdimanında efir üzü görən veriliş tamaşaçılara kələk gəlməyin, bəsit gündəm yaratmağın yeni yolunu tapıb.
Verilişin formatı ondan ibarədir ki, evlənmək istəyən qız və oğlanlar bu proqramda bir-biri ilə tanış olur və sevişib, evlənirlər. Bildirilir ki, artıq proqram ilk evləndirəcəyi şəxsləri tapıb. Önümüzdəki günlərdə onlara toy da ediləcək.
Lakin ATV kanalında çalışan dostlarımızdan birinin verdiyi məlumata görə, bəhs olunan veriliş başdan-başa quramadır və ancaq xalqın başını qatmağa yönəlib.
Məlumatlı şəxsin sözlərinə görə, önümüzdəki günlərdə evləndiriləcək gənclər guya veriliş vasitəsilə bir-biri ilə tanış olub və nəticədə evlənmək qərarına gəliblər. Lakin məsələnin iç üzü qətiyyən belə deyil. "Dəqiq deyirəm ki, evləndiriləcək gənclər 6 aya yaxındır ki, nişanlıdırlar və bir-birini çoxdan tanıyırlar. Lakin verilişin yaradıcıları efirə heç kimi çıxara bilmədiyi üçün bu cür varianta əl atıb və nişanlı gəncləri veriliş vasitəsilə yeni tanış olublarmış kimi təqdim edir.”
Mənbəmiz deyir ki, verilişin tək qüsuru bu olsaydı, dərd yarıydı. Onun sözlərinə görə, verilişin aparıcısı Zaur Baxşalıyev sponsorlar tərəfindən evlənən gənclərə verilən hədiyyələrin təxminən yarısını özünə götürür. "Layihə demək olar ki, iflasa uğrayıb. Bu taktikayla verilişi heç 6 ay da davam etdirə bilməyəcəklər. Ancaq hazırda sponsor şirkətlərdən alınan pulların hesabına verilişi müxtəlif qurama senarilər hesabına davam etdirirlər. Onu da deyim ki, sponsorlardan bir-ikisi verilişə dəstəyi kəsəcəyi təqdirdə, "Onun yarısı” da dayanacaq.”
Məsələ ilə bağlı kanal rəhbərliyinin mövqeyin də öyrənməyə çalışsaq da, nəticə əldə edə bilmədik. Qarşı tərəfin münasibətini də yayımlağa hazırıq.
pia.az
|
